Exo 2 | MPS | STEP | Tama te Israel hani tomode, bidi hani me Livai hanigo te me Livai hanigo wegi sai dao, polobadu.

a[Tpi 7:20; Hi 11:23]

c[Tpi 7:21]

d[Hi 11:24]

e[Tpi 7:23-28]

f[Tpi 7:29; Hi 11:27]

h[Gag 15:13-14]

Exodus 2

Augwaligo te wai Moses elebeo

1 Tama te Israel hani tomode, bidi hani me Livai hanigo te me Livai hanigo wegi sai dao, polobadu. 2 Tama nosali te we haliga elama, tama wai ogwa me deli ame nai. Tama te wego te wai bǫų dwagi yai wai yai baso, geme dualama, tama te wai dualama polua sela bidai. ^a 3 Tama nosali agai te wai ma dualainogo yali usu meni yai, tama agai te basket wa augwaligo te awi diligo nigai selama, tama mege me siyu, tama te megego te basket wa dedage sebelai. Tama agai te wai te basket wa tomode pilama, sela pai, tama te Nail ąį sesegede te sigi sili elalubo digi te wai dualigi pai, te sigi sili tomode, te ąį daide muai. 4 Tama te wai aga abe digibulu gana dulaluyu, tama te wai dali magi sę ebowe naga suainogo tonaluai. 5 Tama aga dolalubadi, te Isip tuni bidigo wegi aga sę we dabe dali te ąįba asai. Tama aga sę we dabe augwali te olo bilalubadi, tama te tuni bidigo wegi ąį paugi pai. Tama te wegi agai te basket wa sigi sili tomode munalubo sulama, tama agai aga sę we me deli tagala palama, tama te wa agabolo sela magasali. 6 Tama tuni bidigo wegi agai te basket wa dalama suali, te wai bǫų ogwa te wade munalubo suai. Tama agai te wa po dabadi, tama te wai bǫų gela wai, tama te tuni bidigo wegi agai te wai homu dene mu eyu, tama agai te po wai, “Te e wai! Te Hibru hanigo wai dao,” te wegigo te po wai. 7 Tama te wai aga abe pąba aselama, te tuni bidigo wegibolo hanaluyu, te po wai, “Te eno Hibru we me i wagi pelama, tama e wai ame menama, tama te e wai te wego negebo usu egowe?”

8 Tama tuni bidigo wegi agai te po wali, “Te usu dao, te nago tama tiao,” wai. Tama te wai aga abego aga ida mu odasa asai. 9 Tama te wai aga ida asai, tama te tuni bidigo wegigo te webolo te po wai, “Eno te wai nago selama, ame mayu, bugagia tonaluao,” wai, “tama eno nage masigigo abelaibao,” wai. Tama te wai aga idago selama, ame mayu, bugagia tonaluai.

10 Tama nosali te wai dwasianu genuai gana ebo si, aga idago te wai te tuni bidigo wegibolo magi pai. Tama tuni bidigo wegigo te wai aga wai mu tiwai yai. Tama agai te po wai, “Te eno e wai ąįde munalubadi, tama eno ugwaba sela holai, tama tebo olama. Tama tibaso, eno agai nogi Moses poai,” wali. ^{▼▼2:10Te Isip pogo te nogi Moses te gasa po wabo dogoni tiwai si pąde dao, te wabo po te “ąįdu ugwaba sela holai,” tama wabo.
,} ^c

Moses Midian buluba wi pai

11 Tama nosali Moses genuai bidi yai, tama agai te Hibru bidi hani sugi pai, te augwali aga hani bidi, tama abagi dabe dao. Tama agai suali, te augwali Isip tuni bidigo sę ebo dene mu yai. Tama agai suali, te Isip bidi me deligo Hibru bidi me deli ela mubo suai, te Moses aga abagi te Hibru hani. ^d 12 Tama Moses agai tonono bilali, te bidi me bidibo subeo. Tama agai polo mu te Isip bidi ela muai, tama te bidi te masigi kemide haluai. 13 Tama te sogo nosali Mosesgo suali, te Hibru bidi me aga si hwįbo suai. Tama Moses agai te wado po olama, hwįani page bidi dali te po wali, “Magi baso nago naga abagi elebawe?”

14 Tama te bidigo Mosesgo po wei ponoyu, te po wai, “Nage te tobolu bidi, tama dago po dodolobo bidi menio. Tama nago ena elainogo, te nago Isip bidi me ela muani tiwai yainogo obawe?” Tama Mosesgo te bidigo te po wabo odolama, aga wi yai. Tama agai te homu yai, ‘Eno te Isip bidi me elali, te we bidi augwaligo polo koneai,’ te homu yai. ^e

15 Tama nosali Isip tuni bidigo Mosesgo te sę yali po odolama, tama agai Moses elainogo yai, tama tibaso Moses aga wi digibulu pelama, te Midian buluba bidigi pai. Aga te tǫba sabolama, tama aga te ąį tubo digi te sesegede dulaluai. ^f 16 Tama te Midian tǫde pris bidi me deli digi bidai, tama agai nogi si, te Ruel, me Jetro. Tama te bidi agai wegi a naga olama me badu nogo si bidai. Tama Moses te ąį ulu tǫ dedagedu asobo digi pąde dulaluai, tama te bidigo wegi dabe te augwa ayago kibu sipsip meme dabe maiabo ąį tuagasu asai. 17 Tama tialima, gasa sipsip tonalubo bidi hani aselama, tama augwaligo te bidigo wegimani ąį tuagasu asobadi, augwali sela sąnama, “Pao,” wai. Tama Moses agai te wegi dabe tau siyu, tama te bidi dabe augwali sela sąwai. Tama nosali Moses agai te wegi dabego kibu sipsip meme dabe ąį mawai.

18 Tama nosali te wegi dabe augwa aya Ruel bidibo digi ma pai, tama augwa ayago augwalibolo hanaluyu, te po wali, “Magi elama, dage megi polo ma asobawe?”

19 Augwaligo po wei ponoyu, te po wali, “Isip bidi me deli agai da tau selama, tama te gasa kibu sipsip tonalubo bidi dabe augwaligo da ela gudulubeo. Tama te bidi agai dago kibu sipsip meme dabe me agai ąį mawai,” wali.

20 Tama te bidi aga wegi dabebolo hanaluyu, te po wali, “Te bidi menade bidibowe? Tama magi baso dagego aga ude taga soaliwe? Dagego te bidi aga i wagi pelama, tama aga da dali nai tuagasomainao,” wali. Tama te wegi dabe pelama, augwaligo Moses odasa asai. 21 Tama nosali Jetro agai homugo Moses aga dali bidimainogo yai, tama Mosesgo te usu dao te po wai. Tama Jetro agai wegi Sipora me Moses mawai, tama Mosesgo te wegi sai. 22 Tama nosali Sipora wai haliga elama, tama ogwa me deli ame nai. Tama Moses agade digi po weyu, te po wali, “Ena gasa bulu tǫ bidi e tǫde bidibao. Tama tibaso, eno te wai nogi Gersom dao obao,” te po wai. ^{▼▼2:22Te Hibru pogo te wai nogi Gersom wabo dogoni te “Gasa tǫde bidibo” po wabo dogoni tiwai si pąde dao.}

23 Tama kibu be meba bidilama, tama nosali te Isip tuni bidi isai. Tama Isip hani augwaligo Israel hanibolo sę dene mu mawai. Tama Israel hanigo Godigo augwali tau somainogo tigidali sogo Godibolo gela weyu, i wai. 24 Tama Godigo augwaligo te gela wabo odoyu, tama Godigo te bomo yai po Abraham, me Aisak, me Jekop, augwali dali dąų wali, te agai koneai, tama agai te augwaligo wąįgo wai dabe augwali tau saibao te po wai, polobadu. ^h 25 Tama tibaso, God agai te Israel bidi hani augwali dodolama mu bidibo suai. Tama agai augwali hobede elama, agai augwali tau sabo homu yai.